تحدث الناقد الفني أحمد سعد الدين عن فيلم أسد، مشيدًا بالتجربة السينمائية التي وصفها بأنها كبيرة وضخمة من حيث الإنتاج والعناصر الفنية.
أحمد سعد الدين : «أسد» فيلم ضخم وصناعة سينمائية على أعلى مستوى
وقال أحمد سعد الدين في تصريح خاص لـ«مصر تايمز»: “فيلم أسد واحد من الأفلام الكبيرة اللي فيها إنتاج قوي جدًا، وكل عناصر العمل السينمائي كانت ظاهرة بشكل واضح، خصوصًا التصوير والديكور وتقنيات الـAI، وكمان المونتاج والموسيقى كانوا على مستوى عالي جدًا، فالفيلم في المجمل تجربة تنفيذها قوية ومميزة”.
وأضاف: “الفيلم نجح إنه يقدم محمد رمضان بشكل مختلف، مش الصورة المعتادة بتاعة البطل العشوائي، لكن هنا هو أقرب لفكرة البطل الشعبي، وفيه بعد إنساني واجتماعي واضح، وده ظهر من خلال فكرة قريبة من التمييز والصراع، وكمان فكرة الحرية كانت حاضرة في الشخصية بشكل كبير”.
وتابع: “أهم نقطة قوة في الفيلم هي العناصر السينمائية نفسها: التصوير الأول، بعده الديكور، ثم تقنيات الذكاء الاصطناعي (AI)، وبعد كده المونتاج والمكساج والموسيقى، كل ده كان متماسك ورافع مستوى العمل”.
واستكمل: “مقدرش أقول إن فيه نقاط ضعف واضحة، لكن ممكن نتكلم عن توقيت عرض الفيلم وهل هو مناسب لذوق جمهور العيد ولا لأ، لكن في النهاية هو فيلم قوي جدًا”.
وأردف: “الفيلم ما كانش ينفعه غير محمد رمضان، هو الوحيد اللي كان يقدر يقدم الشخصية دي بالشكل ده، وظهر بأداء مميز جدًا يمكن من أفضل أدواره في الفترة الأخيرة”.
واختتم حديثه قائلًا: “الفيلم معتمد بشكل أساسي على الدراما وبناء الشخصيات، والأكشن جاي في مرحلة تانية، وفيه كيمياء واضحة بين محمد رمضان ورزان جمال وعلي قاسم، وده ساعد إن الفيلم يطلع بصورة أفضل”.
